साप्ताहिक साधना वाचन विशेषांक परीक्षण

लेखक सुबोध जावडेकर यांच्या 'मग प्रत्येक गोष्टीकडे वैज्ञानिक दृष्टीने पाहू लागलो...' या लेखातून दृष्टीकोनाच्या सीमा नव्याने अनुभवता येतात. बालपणापासून लेखकाचे वाचनविश्व कसे होते, काय आवडले आणि काय मनाला भावले नाही हे कोणताही आडपडदा न ठेवता स्पष्ट शब्दांत सांगितले आहे. विज्ञान साहित्य आणि प्रवासवर्णन या साहित्य प्रकारांविषयी लेखकाने नेमक्या शब्दांत जे लिहिले आहे, ते वाचून लेखकाच्या या विषयाप्रति आवडीची जाणीव होते. बोलीभाषेतले शब्द प्रमाण भाषेतील नसले तरी अशुद्ध नसतात हे सांगणेही नक्कीच विचार करायला लावणारे आहे. वि. वा. शिरवाडकरांच्या 'कल्पनेच्या तीरावर' कादंबरीवर केलेले भाष्य मनापासून आवडले. आयुष्यात आपण नेहमी स्वतःच्या नजरेतून विश्व बघतो. साहित्यामुळे जाणिवेच्या कक्षा विस्तारतात. यांसारखी वाक्यं विचारांची दिशा देतात.