स्वामित्व पुस्तक परीक्षण

या कथासंग्रहाच्या निमित्ताने अतिशय सहजसोप्या भाषेतील उत्तम दर्जाचे साहित्य वाचायला मिळते. लेखिकेच्या ओघवत्या भाषाशैली आणि मांडणीमुळे कथा वाचताना कुठेही क्लिष्टता जाणवत नाही. कथानुरूप भाषा सुयोग्य वळणे घेत जाते. आध्यात्मिक विषयात भाषेचा शांत भाव दर्शवणारा रसाळपणा समोर येतो, तर कौटुंबिक विषयांसोबत भावनांचा कल्लोळ दाखवणारे हृदयस्पर्शी शब्दांकन. सामाजिक पार्श्वभूमी एकप्रकारची परखडताही घेऊन येते अन् प्रबोधनही! प्रत्येक कथा ही नानाविध भावनांचा मिलाप आहे. यानिमित्ताने प्रेम, विरह, रहस्य, गूढ, कौटुंबिक, सामाजिक, आध्यात्मिक,... आयुष्यातील असे विविधांगी पैलू रंजक पद्धतीने वाचायला मिळतात. मुद्देसूद मांडणी ही लेखिकेच्या लेखनशैलीची आणखी एक जमेची बाजू म्हणता येईल. नव्या-जुन्या पिढ्या न कंटाळता वाचू शकतील असे रंजक, उद्बोधक विषय लेखिकेने उत्तमरीत्या हाताळले आहेत. वास्तववादी पात्रांचे चित्रण, मनाला स्पर्शून जाणारे वैविध्यपूर्ण लेखन हाताळणे लेखिकेला छान जमले आहे असे म्हणता येईल. पुस्तकात काही तुरळक शब्दचुका आहेत; पण त्या तांत्रिक कारणांमुळे असाव्यात. लेखिकेचे हे पहिलेच पुस्तक असूनही विषय, मांडणी, सहजसोपी तरीही मनाचा ठाव घेणारी भाषाशैली, अशा अनेक गोष्टींमुळे वाचकांना प्रगल्भ लेखनाची मेजवानी मिळते. एकूणच या पुस्तकाचा छपाई दर्जा आणि साहित्यिक दर्जा उत्तम आहे.