नाती जिव्हाळ्याची - भाग ३

थोडीफार स्थळं त्याने शोधली होती. पण त्यात काही योग नीट जुळून येत नव्हता. रेश्मा दिसायला अगदीच सुंदर होती. रंगाने गोरीपान, पाणीदार डोळे, लांबसडक केस, लाल गुलाबी ओठ, चाफेकळी नाक, मध्यम बांध्याची शरीरयष्टी, उंचीही अगदी तिच्या सौंदर्याला शोभेल अशीच होती. त्यामुळे देखणेपणाच्या बाबतीत सीता आणि सुधीर निश्चिंत होते. काळजी होती ती फक्त मिळणारा नवरा आपली परिस्थिती समजून घेऊन त्यानुसार जुळवून घेणारा असावा हीच. स्थळांची शोधमोहीम चालू होती. त्यातील एक दोन स्थळ भेटूनही गेलेलीत. पण काही जुळलं नव्हतं.