मात्रा

बाहेरून कानावर येणारे टोमणे ऐकून नवीना अस्वस्थ होत होती. आईच्या नजरेला नजर देण्याची तिची हिंमत होत नव्हती; पण आज ह्या गोष्टीचा कायमचा सोक्षमोक्ष लागायलाच हवा होता. तिने आणि सुशांतने स्वत:चं घर घ्यायचं ठरवलं तेव्हाच पूर्ण विचार करून तीन बेडरूमचा फ्लॅट घेतला होता. नवीनाच्या आई-वडिलांना अधून मधून लेकीच्या घरी यायला मिळेल ह्या हिशोबाने. त्यांची एकुलती एक मुलगी होती ती. म्हणूनच नवीनाने सुशांतच्या बरोबरीने कर्जाची जबाबदारी उचलायची तयारी दाखवली. पण घर घेतल्यापासून एक रात्रसुद्धा ते दोघं इकडे थांबले नव्हते. चार महिन्यांपूर्वी तिचे बाबा गेले, तेव्हापासून आई एकटीच राहात होती. तेव्हाही नवीनाला खूप वाटत होतं, आईला आठ-पंधरा दिवस आपल्या घरी आणावं; पण त्यावेळी तिच्या सासूने प्रचंड धिंगाणा घातला आणि नवीनाचा बेत हाणून पाडला होता. आता मात्र नवीनाने स्वत:ला पुन्हा पुन्हा बजावलं.