माझे मन अखेर तुझे झाले _ भाग ३

बाहेर विधी चालू होते तिथे समिधा सर्वांच्या हालचाली टिपत होती. काहीतरी गोंधळ झाला हे तिला कळत होतं. गुरुजींनी एकदोनदा कुमार आणि त्याच्या आई बाबांना बाहेर यायला सांगितलं तरीही ते आले नाहीत. शेवटी गुरुजी म्हणाले तुम्ही आता थोडा वेळ तुमच्या खोलीत आराम करा. तुम्हाला मी परत बोलावतो. नक्की काय ते कळत नव्हतं परंतु समिधाच्या मनात येत होतं की नावाप्रमाणे आपल्या आयुष्याची आहुती द्यावी लागणार की काय. आई बाबा बाहेर थांबून काय चाललंय त्याचा कानोसा घेत बाहेरच थांबले. समिधा आतमध्ये येऊन जरा खुर्चीवर निवांत बसली. तिच्या मनात आलं आपलं मनोज बरोबर लग्न झालं असतं तर आज ही अशी अनिश्चितता जाणवली नसती. त्या अल्पावधीत तिच्या डोळ्यांसमोरून तिचा भूतकाळ सरकून गेला.