माझे मन अखेर तुझे झाले _ भाग ४

समिधा मोठी होत होती. बारावी नंतर शिकवण्या घेऊन घरात मदत करत होती. कॉलेजचे मोरपंखी दिवस तिला खुणवत होते. अभ्यासाबरोबर ती इतर स्पर्धांमध्ये पण भाग घ्यायची. सगळीकडेच ती चमकत होती. ती एफ वाय बीकॉम ला असताना तिला सिनिअर असलेल्या मनोजशी तिची एकांकिका स्पर्धेच्या निमित्ताने ओळख झाली. समिधा मुळातच खूप देखणी होती. गव्हाळ वर्णाची, मध्यम उंचीची, कमनीय बांध्याची समिधा बघता क्षणीच सर्वांचे लक्ष वेधून घ्यायची. तिचे काळेभोर बोलके डोळे आणि सरळ रेशमी केस नजरबंदी करायचे. मनोज श्रीमंत आणि एकदम राजबिंडा होता. सावळा वर्ण, पावणेसहा फूट उंची, नागमोडी वळणाचे केस त्याला शोभून दिसायचे. त्याचा आवाज एखाद्या नायकाला शोभेल असच होता.