माझे मन अखेर तुझे झाले _ भाग १७

असं म्हणून समिधा तिथून उठली आणि मागे न वळता पटकन निघाली. एक बरं होतं की हे शेवटचं वर्ष होतं आणि परीक्षा जवळ आली होती त्यामुळे आता मनोजशी समोरासमोर भेट होण्याचा जास्त प्रश्न येणारच नव्हता. तिच्या मनात आलं हा प्रेमाचा काळ किती रमणीय होता. जळी, स्थळी, काष्ठी, पाषाणी आपण मनोजलाच पाहत होतो. एक बरं आहे की आपल्या घरच्यांना आपल्या प्रेमाबद्दल काही माहीत नाही. नाहीतर त्यांच्या मनावर खूप मोठा आघात झाला असता. आपल्या मुलीच्या बाबतीत असं घडलं तर आई-वडिलांना किती मानसिक त्रास होतो.