माझे मन अखेर तुझे झाले _भाग २१

मंगलाष्टकं चालू होती आणि अभिरामच्या मनात येत होतं की आपण कधी लग्न करू असा विचार पण केला नव्हता. आपलं जीवन म्हणजे एका फकीराचं जीवन होतं जे अगदी सरळ रेषेत चाललं होतं. आपण कधीच सोसायटीत अथवा कार्यालयात कोणाच्या अध्यात मध्यात नसतो. एक आहे कोणी अडला नडला दिसला तर आपण त्याला लगेच मदत करतो. त्यामुळे अशा सर्वांचे आपल्याला नेहमीच आशीर्वाद मिळत असतात. कदाचित त्यातलाच एखादा आशीर्वाद फळला असेल आणि समिधा सारख्या सर्वच बाबतीत सरस असलेल्या मुलीशी आज आपलं लग्न होतंय. आपण तिच्याशी लग्न तर करतोय पण तिला आपण पूर्ण न्याय देऊ शकू ना. तिच्या अपेक्षा आपण पूर्ण करू शकायला हवं ना. एकंदरीत समिधा खूप समजूतदार वाटते आहे. कदाचित दाखवायचे दात वेगळे आणि खायचे दात वेगळे असं असेल तर आपल्या आयुष्यात खूप प्रश्न निर्माण होऊ शकतात.