माझे मन अखेर तुझे झाले _ भाग २५

संध्याकाळी सर्वांचा आराम झाल्यावर अभिरामने सर्वांना आपलं घर दाखवलं. त्याचं घर म्हणजे अद्ययावत इंटेरियर असलेला सुंदर फ्लॅट होता. सुरुवातीला पॅसेज मध्ये खूप छान अशा पद्धतीने वेगवेगळ्या कलात्मक फ्रेम्स लावल्या होत्या. हॉलमध्ये सोफासेट, चेअर्स सर्व उच्च अभिरुचीच्या होत्या. हॉलला जोडून जी गॅलरी होती त्यात विविध आकर्षक रोप लावली होती. एका वॉल ला वॉलपेपर आणि इतर ठिकाणी आकर्षक रंगसंगतीचा रंग दिला होता. मास्टर बेडरूम मध्ये मंद आकाशी रंग दिला होता. पलंगाच्या दोन्ही बाजूला छोटी चौकोनी आकाराची टेबल्स दोन्ही बाजूला आणि देखण्या नक्षीचे नाईट लॅम्प होते. बेडरूम प्रशस्त होती. तिथे अजून एक सोफासुद्धा ठेवला होता. दुसरी बेडरूम पण तशीच खूप सुंदर रीतीने सजवलेली होती. किचन पण हल्लीच्या मानाने खूपच मोठं होतं. समोरासमोर दोन किचन प्लॅटफॉर्म होते. एका बाजूला अद्ययावत ट्रॉलीज होत्या दुसऱ्या बाजूला सुंदर सन्मायका लावलेले युनिट्स होते. वॉशिंग मशीन आणि मोठ्या आकाराच्या फ्रीजसाठी समोरासमोर जागा होती. एकंदरीत घराचं सौंदर्य समिधाच्या मनात भरून राहिलं.