माझे मन अखेर तुझे झाले _ भाग ३८

चार चिनार परिसरात समिधा सारं काही डोळ्यात साठवत चालत होती इतक्यात तिचं लक्ष समोरून येणाऱ्या मनोज आणि त्याच्या आई बाबांकडे गेलं. तिच्या चेहऱ्यावरचे भाव क्षणार्धात बदलले. तिच्या मनात आलं ह्यांना पण आताच काश्मीरला यायचं होतं का? अभिरामच्या लक्षात समिधाची मनःस्थिती आली. मनोजला दोन वर्षांनी पाहिल्यानंतर तिला तिच्या प्रेमभावनांना आवर घालणे थोडं कठीण गेलं. जर अजूनही ते प्रेमबंधनात तसेच असते तर दोघांनीही धावत येऊन एकमेकांना मिठी मारली असती. पण आता ते शक्य नव्हते. मनोजने पण समिधाला लांबूनच पाहिलं. तिला दुसऱ्या पुरुषाबरोबर पाहून त्याचं मन दुखावलं. त्याने त्याच्या आईचं ऐकून समिधाला दूर केलं त्यामुळे तिच्या ग्रुपमधल्या सर्वांनी त्याच्यावर एक प्रकारे बहिष्कार घातला होता. समिधा सर्वांचीच लाडकी होती. त्यामुळे समिधाचे लग्न झाल्याचं त्याला लांबून लांबून कळलं होतं. तेव्हाच समिधा आता आपली कधीच होऊ शकणार नाही ह्याची त्याला खात्री पटली. आईने विरोध केला नसता तर समिधा आज आपल्याबरोबर असती. जर आणि तर माणसाला किती आशावादी बनवतात ना! पण आज समिधा तिच्या नवऱ्याबरोबर अशी अचानक आपल्यासमोर येईल असं त्याला वाटलं नव्हतं.