माझे मन अखेर तुझे झाले _ भाग ५०

रात्री अकरा वाजता दोघं घरी आले. काका झोपले होते. दोघेजण आपल्या जागेवर झोपायला गेले. समिधाला घरचे सर्व भेटले होते त्यामुळे खूप आनंद झाला होता. त्या आनंद लहरीवर डोलत असताना तिला झोप लागली. अभिरामच्या मनात वेगळेच विचार चालले होते त्यामुळे झोपेने त्याच्याशी कट्टी घेतली होते. निघताना त्याने सायलीला समिधाचा वाढदिवस कधी असतो ते विचारलं होतं. त्याला आश्चर्याचा धक्का बसला कारण समिधाचा आणि त्याचा वाढदिवस एकाच दिवशी होता. १८ जानेवारी. पुढच्याच रविवारी तो दिवस होता. अभिरामने मनोमन ठरवलं होतं की समिधाचा वाढदिवस खूप थाटात साजरा करायचा. मुख्य म्हणजे तिच्यासाठी हे सरप्राइज ठेवायला हवं. समिधाच्या काही आवडीनिवडी त्याला कळल्या होत्या. काही गोष्टी तो सायलीला विचारणार होता. आई बाबा आणि सगळ्यांनाच त्याने सकाळीच बोलवायचं ठरवलं. यावेळी आपल्या बाबांनी उपस्थित राहायला हवं. बाबांना फोन करायला हवा. दुसऱ्या दिवशी काकाला विश्वासात घेऊन त्याने समिधाला सरप्राइज देण्याबद्दल सांगितलं. इथे सायलीने पण आईबाबांना अभिरामच्या प्लान बद्दल सांगितलं. सर्वांनाच खूप भारी वाटत होतं.