मी तुला माझ्यात जपणार आहे 9

     श्रीचे आतमधून तिला न्याहाळणे सुरू होते..तिला त्याची,एका पुरुषाची किती गरज आहे त्याला हे जाणवू लागले..तिला तसे करतांना बघून त्याच्या डोळ्यात पाणी जमू लागले..तिला होणारा त्रास त्याला बघावल्या गेला नाही.. 

      बरीच हिम्मत करून तो जागेवरून उठला, त्याने अंगातला शर्ट काढून फेकला..एक बॉडी स्प्रे मारला..एक मोठा श्वास घेत बाल्कनीमध्ये जात तिच्या जवळ जात तिला काही कळायच्या आतच तिला उचलून घेतले..तिच्या डोळ्यात अश्रू होते पण त्यात सुद्धा त्याच्याप्रती ओढ दिसत होती..

        श्रीने तिला बेडवर आणून झोपवले..तो तिला अगदी फुलाप्रमाणे जपत तिच्यावर किसचा वर्षाव करू लागला..आता ती सुद्धा त्याच्या स्पर्शाने मोहरुन जायला लागली होती..बऱ्याच वेळ त्याचा हाच खेळ सुरू होता..तो पुढे जात नव्हता की कपड्यांचे अडसर सुद्धा बाजूला सारत नव्हता..शेवटी त्याला तो करत असलेले नाटक असह्य झाले आणि तो ताडकन तिच्यावरून उठत शर्ट घालत तिच्याशी काहीच न बोलता रूमच्या बाहेर पडला.. 

           श्रीचे असे वागणे आता मात्र तिला असह्य झाले.माझ्यात काय कमतरता आहे की श्री सतत मला नाकारतो आहे,या भावनेने तिला रडू कोसळले..रडतच ती बाथरूममध्ये शॉवरमध्ये जाऊन बसली..शॉवरच्या पाण्यामध्ये तिचे अश्रू सुद्धा विरघळत होते..तिच्या डोक्यात श्रीचे वागणेच येत होते,ती आता त्याच्यासोबत बेडवर सुरू असलेला एक एक क्षण आठवत होती..तसे तिच्या लक्षात आले की तो जे काही करत होता,ते वर वर तिला दाखवण्यासाठी होते, ते करतांना जे नैसर्गिक बदल होतात तसे काहीच बदल त्याच्यात तिला जाणवले नव्हते..रडता रडता तिचे लक्ष बाथरूम सभोवताली फिरत होते..पिंकिष टॉवेल,तसेच रंगाचे इन्नर वीअर होते. श्री कधीच बाथरूम lमध्ये कपडे राहू देत नव्हता,पण आज त्याच्या नजरेतून हे सुटले होते..बाथरूममध्ये साबण,शाम्पू सगळं सगळं मुली वापरतात तसेच दिसत होते..ते बघून आता तिच्या लक्षात आले की श्रीने जो परफ्यूम लावला होता तो पण फिमेल होता..

"शी मीरा,तू काहीपण विचार करतेय..तो जवळ येत नाही म्हणून असं थोडी काय असू शकते?" ती स्वतःशीच बोलत होती..उठतच ती बाहेर आली,तिचे ओले झालेले कपडे बदलायचे म्हणून तिने कपाट उघडले..डोळे पुसत पुसत काड्यांची हुसकवासक करू लागली..कपडे का मिळत नाही आहे बघितले तर तिच्या लक्षात आले तिने श्रीचे कपाट उघडले आहे..आणि तिच्या हाताला पफवाली ब्रा लागली..ते बघून ती थोडी शॉक झाली..नंतर परत कपडे हुसकू लागली तर एक बॅग सापडली,त्यात बरेच बायकी कपडे,दागिने, टिकल्या, बांगड्या तिच्या हाताला लागले.. तिच्या हाताला ती ओढणी पण सापडली ज्यासाठी लहानपणी ताईची ओढणी लपवली म्हणून त्याने खूप मार खाल्ला होता,पण तो सतत ओढणी मी नाही घेतली म्हणून बोलत होता,तो खोटं का बोलला असावा...आता मात्र तिच्या मनात एक वेगळीच भीती निर्माण झाली होती..तिच्या लक्षात आले तो काहीतरी नेहमी लिहित असतो..तिने त्याची ती डायरी शोधली आणि वाचू लागली..ते वाचतांना तिच्या डोळ्यातून घळघळ अश्रू वाहू लागले…दोन तीन पान वाचले होतेच की तेवढयात श्री रूममध्ये आला, तिच्या हातात डायरी बघून आता मात्र तो समजून गेला होता..

"श्री, तुझ्यात शारीरिक काही प्रॉब्लेम आहे काय?तू पुरुष.." तिने सरळ सरळ प्रश्न केला. 

"नाही." 

"मग हे सगळं?"