मिळावे तुझे तुला भाग १

रियाच्या येण्याने सुमनताईंच्या दैनंदिन आयुष्यात तसा फार बदल झाला नव्हता. स्वयंपाक घरातली संपूर्ण जबाबदारी त्या एकहाती सांभाळत. सकाळी धावपळीच्या वेळी, गरमगरम नाष्टा आणि जेवणाचा डब्बा जसा त्या प्रथमेशला देत तसा रियालाही देत. रीया, ऑफिसमधून येइस्तोर सुमनताईंचा स्वयंपाक आवरलेला असायचा. कूकर उघडून ताटात वाढलेला गरमागरम वरण भात त्यावर तुपाची धार आणि आयत्या वेळी बनवून वाढलेली गरम पोळी. "आहाहा! हेचं काय ते, स्वर्गसुख" म्हणत.. माधवराव आणि प्रथमेश उलट्या हाताने जेवणाचा फडशा पाडत. "तू ही बस गं जेवायला", रियाला ही त्या गरमागरम वाढायच्या. रियाला या गरमागरम जेवणाचं मुळीच अप्रूप नव्हतं. 'जीभेचे चोचले पुरवण्यासाठी, फुकट जाणाऱ्या वेळेचा सदुपयोग आणि त्यासाठीचा खटाटोप, असच तिला वाटत होतं. 'सासूच्या हातच गरम खायला नशिब लागतं' ते तिच्या वाट्याला आलं होतं, तो आनंद मात्र मोठा होता.