मोहात अडकवणारा तो एक क्षण १

आज "स्वस्तिका" बंगला अगदी नव्या नवरी प्रमाणे सजला होता. कारण ही तसेच होते , कालच सागर आणि श्वेताचे लग्न झाले होते. घरात आनंद सळसळत होता. आज त्या दोघांची मधुचंद्राची रात्र होती. गुलाबाची फुलं, हार, गजरे, सुवासिक मेणबत्त्यांनी त्यांची पूर्ण खोली खूप आकर्षक पद्धतीने सजवली होती. सागरचे मित्र त्याला आता तो कसा बायकोचा गुलाम होणार म्हणून भारी भारी पीजे मारत त्याला चिडवत होते. पण त्याला आता ओढ मात्र फक्त या गोड क्षणांची लागली होती. इकडे श्वेताची पण परिस्थिती काही वेगळी नव्हती. ब्युटीशियन श्वेताला तयार करत होती तर वहिनी, नंदा , मैत्रिणी तिला पहिल्या रात्रीच्या कुठल्या कुठल्या गोष्टी सांगून घाबरवत होत्या तर कधी कुठला जोक सांगून स्वतःच जोरजोराने हसत होत्या. मात्र श्वेता सुद्धा सागरच्या स्वप्नात रंगली होती.