मोहिनी – अदृश्य संमोहित साम्राज्य (भाग ०४)

अर्णव निघून गेला. सिद्धांत जीपमध्ये बसूनच अर्णवच्या परतण्याची वाट पाहत होता. अर्णव येईपर्यंत काय करावं हे त्याला सुचत नव्हतं. तो काहीवेळ मोबाईलवर काहीतरी पाहत बसला होता; पण काही वेळात त्याला त्याही गोष्टीचा कंटाळा आला. त्याने आजूबाजूला पाहिलं. दूरवर त्याला एक जंगल दिसत होतं. त्याने आज पहिल्यांदाच त्या जंगलाकडे पाहिलं होतं. ते जंगल त्याला खुणावत होतं. जंगलातून एक प्रचंड शक्ती त्याला संमोहित करत होती. ते जंगल त्याच्याही नकळत त्याला स्वतःकडे खेचत होतं. त्याने जीप जंगलाच्या दिशेने वळवली. वेगाने त्याची जीप जंगलाच्या दिशेने जात होती. मात्र हे सर्व त्याच्या मनाने होत नव्हतं. तो भानावर नव्हताच. एका कळसूत्री बाहुलीप्रमाणे त्याला नियंत्रित केलं जात होतं.