मोहिनी – अदृश्य संमोहित साम्राज्य (भाग ३५)

             प्रातःकाळी सूर्यकिरणे वेगाने पसरू लागली होती. रक्तिमा आणि प्रभृती स्नान करून तयार झाल्यानंतर जणू गायबच झाल्या होत्या. साऱ्या मोहिनी त्यांना शोधत होत्या. मोहिनींचे रूप हे प्रकृतीला साजेसे असायचे. त्यामुळे या निसर्गात त्या सहज हरवून जात. रागिणी, अलकनंदा आणि पद्मिनी या मधुरिमाच्या सहकारी होत्या. लहानपणापासून त्यांनी रक्तिमा आणि प्रभृतीला अगदी जीव की प्राण करून जपले होते. मोहिनींच्या राज्ञीचे रक्षण हा त्यांचा धर्म होता आणि त्यासाठी आपली सर्व ताकद एकवटण्याची तयारी ठेवणाऱ्या त्या राजनिष्ठ मोहिनी होत्या. रक्तिमा आणि प्रभृतीच्या साऱ्या खोड्या आणि स्वभाव त्या अगदी बरोबर ओळखून होत्या. रागिणी, तसेच पद्मिनी आणि अलकनंदा वेगवेगळ्या वाटांनी त्यांच्या अपेक्षित ठिकाणी त्यांना शोधू लागल्या. रागिणी तलावापासून अतीव पश्चिमेकडे असणाऱ्या दाट वृक्षांमध्ये शोधत होती. इतक्यात रागिणीच्या चेहऱ्यावर स्मित पसरले. समोर असणाऱ्या एका उंचशा वृक्षावर ती निवांत झोपली होती.