मोकळं आभाळ भाग २५

“रेवा, आधी शांत हो बघू. रडणं थांबव. तुझं सारं म्हणणं मी ऐकलं. आता मी काय सांगते ते ऐकून घे. रेवती, पहिल्या मीटिंगपासून ते आता पर्यंतचा तुमच्या दोघांचा प्रवास नीट आठवून बघ, आजवर ओंकार कधी तुझ्याशी चुकीचं वागलाय? कधी वाईट बोललाय? नाही ना! वेळोवेळी त्याने तुला प्रोत्साहन दिलं. नवीन धंदा सुरू करता यावा म्हणून सर्वोतोपरी प्रयत्न केले. तुला कंपनीचा पूर्ण सेटअप बसवून दिला. तुझ्या सोबत कठीण प्रसंगात उभा राहिला. अजून काय हवं असतं ग एका मुलीला आपल्या जोडीदाराकडून? जी व्यक्ती तुझ्या सदैव सावली सारखी पाठीशी असते तिच व्यक्ती आयुष्याचा योग्य जोडीदार असू शकते. मला ओंकारचा प्रामाणिकपणा स्पष्ट दिसतोय. त्याचं तुझ्याविषयी असलेलं प्रेम खोटं नाही. खूप चांगला मुलगा आहे तो. त्याला नकार देण्यापूर्वी तू विचार करायला हवा होतास”