मोकळं आभाळ भाग २०

रेवतीने कामाला सुरुवात केली. कापड मागविण्यात आलं. रोजच्या उत्पादनाचं प्लॅनिंग करण्यात आलं. तीन शिफ्ट मध्ये काम सुरू झालं. दिवस रात्र युनिट जागं राहू लागलं.. ही ऑर्डर पूर्ण करणं तिच्यासाठी खूप महत्वाचं होऊन बसलं होतं. तिचे सहकारी, कंपनीतले स्त्री कामगारवर्ग सर्वजण तिला सहकार्य करत होते. सर्वांनाच ही ऑर्डर पूर्ण करून देण्याच्या ध्यासाने पछाडलं होतं. रेवती स्वतः लक्ष घालत होती. त्यांना प्रोत्साहन देत होती. रोजच्या ‘लिटिल वर्ल्ड’ च्या उत्पादनाचा अहवाल ओंकारला देत होती. त्याचबरोबर मुंबईच्या ऑफिसला अभ्यंकरसरांनाही कळवत होती. एकदा अभ्यंकरसर पुण्यात येऊन कामाची परिस्थिती पाहून गेले होते. रेवतीचा उत्साह, तिचा आत्मविश्वास थक्क करून टाकणारा होता. अभ्यंकरसरांना तिचं खूप कौतुक वाटलं होतं. तिची धडपड वाखाणण्याजोगी होती.