मोकळीक भाग ... ४ अंतिम भाग

“माझी सासू माझ्याशी कशीही वागली तरी त्याचं दोन्ही नातवंडांवर अतिशय प्रेम होतं. अमोलवर जरा जास्तच म्हणून मी कधीही आजीबद्दल सांगून त्यांच मन कलूषित नाही केलं. त्याच्या आजीचे वागणं खायचे दात वेगळे आणि दाखवायचे वेगळे असं असल्यामुळे फारसं कोणाच्या लक्षातही नाही आलं. आमचे वाद आम्ही आमच्या पुरतेच मर्यादित ठेवले पुढच्या पिढीपर्यंत पोहोचवले नाहीत यामुळेच तर अमोल आणि त्याच्या चुलत भावंडांच छान पटतं. मी नेहमी म्हणायचे माझी सून आणि मुलगा वेगळं रहातील मला जो त्रास झाला तो तिला होऊ देणार नाही यावरून त्याला अंदाज आला असेल असं वाटतं. तुलाही इतकं उलगडून सांगितलं नसतं पण घरातलं वातावरण एकदमच बदललं म्हणून बोलावं लागलं. आपणच आहोत ग आपल्याला तुम्ही आम्हाला आणि आम्ही तुम्हाला, काही कमी जास्त झालं तर धावून यायला. एकमेकांसाठी काही करताना फक्त कर्तव्य आणि जवाबदारी ही भावना नसावी. दूर राहूनही आपलेपणाची ओल जपावी म्हणून हा घाट घातला बाकी काही नाही.” आपल्या मनात काय आहे ते उषाताईंनी प्रामाणिकपणे सांगितलं.