मोक्षदा (भाग-३)

"ताई, तुम्हाला सार्थक आवडतात मला माहिती आहे पण तुम्ही भूतकाळ आठवून गप्प आहात, हो ना? ताई, ती घटना घडायची होती ती घडून चुकली. तिचा विचार करून वर्तमान कशाला अंधारात कोंडायचा? सार्थक जीवापाड प्रेम करतात तुमच्यावर. त्यांना तुम्हाला ते सुख द्यायचे आहे, ज्या सुखाचा तुम्हाला पूर्ण अधिकार आहे. त्यांना नाही फरक पडत तुमचा काय भूतकाळ आहे... ते फक्त वर्तमान आणि भविष्याचा विचार करत आहेत. प्रत्येकाला नाही मिळत असे प्रेम करणारे कोणी... मी तर हाच सल्ला देईन की तुम्ही तुमच्या आयुष्यात नवे रंग भरायला हवे. पुढे तुम्ही निर्णय घ्यायला स्वतंत्र आहात. फक्त माझे एवढेच म्हणणे आहे की जर सुख स्वतः तुम्हाला साद घालत असेल तर तुम्ही पाठ फिरवायला नको. येतो आम्ही. पटले असेल तर काही दिवस विचार करा तरीही तुमचा नकारच असेल तर आम्ही स्वेच्छेने स्वीकारू तुमचा निर्णय." भक्ती म्हणाली आणि खोलीतून निघून गेली. तिच्या मागे ज्ञानेशही गेला.