मुखवटा भाग ७

           ती जेव्हा पहिल्यांदा शाळेत दाखल झाली होती तेव्हा तिची ओळख कर्मचारी वर्गाबरोबर करुन देण्यात आली होती. उज्जला मॅडम तिला घेऊन कर्मचारी बसतात त्या रुममध्ये आल्या होत्या. मैथिलीने अगदी साधा पेहराव केला होता. साधा सलवार कुडता, डोळ्यांवर चष्मा, केस अगदी तेल लावून विंचरले होते. तिला तसे पाहुुन राणावत कुटुंबाला चांगलाच धक्का बसला असता. मैथिली घरात आली तेव्हाची आणि आता शाळेत जात आहे तेव्हाची मैथिली यात जमीन अस्मानाचा फरक होता. खरेतर तिची ती पहिली चुक होती जे ती आहे अशीच राणावत कुटुंबाला दिसली होती पण शाळेत जाताना तिने जो अवतार केला होता तो वेगळ्या कारणासाठी होता. तिचे व्यक्तिमत्त्व पाहता कोणाच्याही नजरेत ती सहज येऊ शकत होती आणि हे तिच्या कामासाठी योग्य नव्हते म्हणून तिने तिची वेशभूषा बदलली होती पण आधीच चलाख असणारे राणावत कुटुंब तिच्या या अवतारावर संशय घेणार नाहीत असे होईल का? नक्कीच ते संशय घेऊ शकत होते म्हणून तर मैथिली घरुन निघताना तिच्या नेहमीच्या वेशभूषेत गेली आणि नंतर एका ठिकाणी जाऊन कपडे बदलून ती शाळेत गेली होती. हे ठिकाण तिने तिच्या कामासाठी भाड्याने घेतले होते तसेच राणावत कुटुंबाने समजा चुकुन घराबाहेर काढलेच तर तेच ठिकाण तिला उपयोगी पडणार होते.