नावरसी भाग १

सुनीता बाळंत झाली होती. तिला छान गोंडस मुलगा झाला होता. एक दिवस तो छोटासा जीव रडून रडून लालबुंद झाला होता. शेजारच्या जमलेल्या आयाबाया वेगवेगळे सल्ले देत होत्या. कुणी दृष्ट काढायला सांगत होते तर कुणी पोटातले झाले असेल म्हणत होते. बाळाची आई सुनीता बाळाला शांत करत होती. ती बाळाला दुध पाजण्यासाठी पदराखाली घेत होती; पण बाळ रडायचे अजिबात थांबत नव्हते. बाळाचे पोट दुखत असेल म्हणून बाळाची आज्जी सगुणाबाईने तेलाची बाटली घेतली आणि ओटीपोट, लवण येथे बाळाला तेल लावून चोळू लागली तरी बाळ शांत होत नव्हते. कोणीतरी बोलले घास मुटका टाका तर तो उताराही बाळावरून उतरुन टाकला.