नकळत सारे घडले - भाग ६३

पण इकडे मल्हारला वाटतं होते त्याच्यातच काही कमी असेल, म्हणून मिताली त्याला सोडून पळून गेली. आणि म्हणूनच तो स्वतः ला कमी समजू लागला होता. मीरा सोबत लग्न होऊनही तो तिच्या जवळ जात नव्हता. आधी ते बोलायचे तसे मैत्रीपूर्वक तरी बोलावे असे मीराला कायम वाटायचे. निदान त्याच्या मनात काय आहे हे तरी समजेल, पण मल्हार कायमच शांत असायचा. मीरा बोलायला लागली की तो उठून निघून जायचा आणि ती झोपली तेव्हाच रूममध्ये परत यायचा. काही दिवसांनी हे मीराला सुद्धा समजले होते त्याचे वागणे. तेव्हापासून ती स्वतचं त्याच्याशी बोलणे टाळत होती, पण असे किती दिवस चालणार होते. कधी ना कधी बोलावेच लागणार होते. नवरा बायको म्हणून बाहेर एक आणि घरात एका खोलीत वेगळेच रूप दिसून यायचे त्याचे.