नकळत सारे घडले - भाग १

तिथे असलेले पाहुणे मुलीला दोष देत होते, पण तिचे आई वडील देखील तिथेच मंडपात होते. त्यांना सुद्धा हे पचवणे जड जात होते, की त्यांची मुलगी पळून गेली आहे; त्यामुळे तिच्या आई वडिलांना बोलून काहीच उपयोग नव्हता. उगाच त्यांच्या जखमेवर मीठ चोळल्यासारखे झाले असते; त्यामुळे शक्य होईल तितके त्यांच्याशी शांतपणे बोलणे सुरू होते, पण मामांचा मधेच आवाज चढत होता. त्यांना हे जे काही झाले होते ते मुळीच आवडलेले नव्हते; त्यामुळे मुलीच्या आई वडिलांची यात चूक जरी नसली तरी ह्या सगळ्याला ते सुद्धा कुठे ना कुठे कारणीभूत असणारच! म्हणून मामांची त्यांच्यावर चिडचिड होत होती.