नकळत सारे घडले - भाग २६

मीरा आजूबाजूला बघत पुढे चालत होती, तर मल्हार स्टेजवर लावलेल्या नावांकडे बघत होता. सकाळी तिथे मिल्हार आणि मिताली लिहिलेले होते आणि आता तिथे मल्हार आणि मीरा टाकले होते. आयुष्यात कधी काय अचानक घडणार हे कोणीच सांगू शकत नाही. आपण फक्त पुढे चालत राहायचं आणि येणाऱ्या प्रत्येक क्षणाला तोंड देत राहायचं. कधी कधी आपल्या भल्यासाठीच असते सगळे आणि आपल्या आसपास असणाऱ्या व्यक्ती आपल्याला सांभाळून घेत असतात; त्यामुळे त्यांना डावलून चालणार नाही. आपल्या जे हवे असते ते कधी कधी होते, पण थोड्या वेगळ्या पद्धतीने; म्हणून ते आपल्यासाठी वाईटच असेल असे नाही. आपल्या चांगल्यासाठी काही गोष्टी नकळत घडत असतात, पण आपल्याला त्या खूप उशिराने कळतात. तसेच आत्ता मीरा आणि मल्हारच्या बाबतीत झाले होते. पुढे त्यांच्या आयुष्यात कित्येक सुंदर क्षण येतील हे अजून त्यांना माहिती नाही; त्यामुळे ते सध्या तरी एकमेकांना जाणून घ्यायला पुरेसा वेळ देत होते.