नकळत सारे घडले - भाग ३१

तात्यांनी निघताना आठवणीने तिथले कार्यालय आणि जेवणाचे जितके पैसे झाले तितके भरून दिले होते. खरंतर मितालीचे वडील आणि भाऊ दोघेही नकोच म्हणत होते, पण त्यांना ते योग्य वाटले नाही. त्यांनी त्यांच्या वतीने जितके होईल तितके बघितले आणि पैसे भरून दिले. शेवटी मुलीच्या लग्नाचा खर्च हा इतरांकडून करवून घेणे त्यांना बरोबर वाटले नाही. मुलीचे लग्न म्हटले, की खर्च हा होतोच आणि तसेही इथे तर सगळे तयारच होते; त्यामुळे त्यांना जास्त काही करायची गरज पडली नाही. हा फक्त हौस मौज करता आली नाही, त्यांचे इतके मात्र बाकी राहिले. पण ते ही मीरा सासरी घरी गेल्यावर नक्कीच भरून काढणार ही खात्री होती.