नकळत सारे घडले - भाग ३३

संपूर्ण देवघर झेंडुंच्या फुलांनी छान सजवले होते. बहुतेक सकाळी सकाळी कोणीतरी देवपूजा केली असावी. सगळे देव आंघोळ करून मस्त फुलांनी सजवून बसवले होते. जणू काही ते आपल्याला बघून हसत असल्याचा भास होत होता. उदबत्तीचा सुवास दरवळत होता, त्याने अधिक प्रसन्न वातावरण निर्माण झाले होते. मीराने देवाला हळदीकुंकू वाहिले आणि नमस्कार केला.
'देवा, लग्नानंतरचा आज माझा पहिला दिवस. हे घर मला परके नाही, तरीही हे नाते नवीन आहे. मी माझ्या परीने सगळ्यांना सांभाळून घेण्याचा प्रयत्न करत राहीन. मल्हारला मी अगदी मनापासून स्वीकारले आहे, पण त्यांच्या मनात काय आहे हे काही कळतं नाहीये. मनातून तर खूप भीती वाटतं आहे. देवा सगळे छान होऊ दे.'
मीरा मनातल्या मनात देवाला प्रार्थना करत होती.