नकळत सारे घडले - भाग ३६

घरात म्हातारी माणसं असणे गरजेचे असते. लग्नाच्या घाई गडबडीत अशा चुका होतच असतात किंवा काही पद्धती विसरायला होतात. घरातली जुनी जाणती म्हातारी माणसं आठवणीने सगळं सांगत असतात. त्यांना बरोबर सगळे लक्षात असते. अगदी बारकाईने त्या सगळीकडे लक्ष ठेवून असतात. आताच्या काही गोष्टी त्यांना आवडत नसल्या तरी आपल्या मुलांसाठी त्या हौसे खातर करू देतात. बडबड मात्र खूप करतात, कारण त्या प्रत्येक पद्धतीमागे काहीतरी कारणे असतात ती समजून घेतली पाहिजे, पण आताच्या मुलांना त्या जुन्या चालीरीती आवडत नाही. मॉर्डन म्हणत जुन्या पद्धती विसरत चाललेली ही आजची पिढी काही भलत्याच नवनवीन कल्पना बाजारात आणत असतात. काहींना त्या पटतात पण काहीना बिलकुल आवडत नाही, म्हणून त्यावरून पण बडबड सुरु असते. पण खरचं, आधीच्या काळी प्रत्येक गोष्टीला महत्व होते आणि त्यामागे काही वैज्ञानिक कारणे देखील लपलेली होती. म्हणून जुनी माणसं सांगतात ते नीट लक्ष देऊन ऐकणे गरजेचे असते. अगदी सगळेच नाही पण काही गोष्टी ह्या त्यांचे ऐकून नक्कीच केल्या पाहिजेत, जेणेकरून त्यांना पण वाईट वाटणार नाही आणि आपण सुद्धा नवीन पद्धती स्वीकारु शकतो. नवे जुने असे सगळेच यांच्यात ताळमेळ साधने गरजेचे आहे. यालाच तर घराला एकसंध बांधून ठेवणे म्हणतात.