नमुनेदार बाई... पमा ताई भाग -२

पमाताई तशाही बातमीदार म्हणूनच पंचक्रोशीत प्रसिद्ध. त्या दारात दिसल्या की कोणीही विचारायचं," हं ,काय नवीन बातमी?"
तर अशीही सईच्या लग्नाची वार्ताही पमाताई मार्फत सर्व गावभर पसरली.
पण तिखट मीठ लावूनच. 'आधीचच होतं तिचं.'हे प्रत्येक ठिकाणी सांगायला त्या विसरल्या नाहीत.
परिणाम व्हायचा तोच झाला.
सई तिच्या मैत्रिणीकडे गेली. तिच्याकडे शेजारच्या काळे काकू बसल्या होत्या .त्यांनी सईचे अभिनंदन केले आणि म्हणाल्या,"नाव काय ग मुलाचे?"
सई ,"सौरभ"
"कुठे झाली ग तुमची भेट? आधीचीच ओळख होती म्हणे. तुझा कॉलेजमधला मित्र आहे का तो?"काळे काकू खवचटपणे विचारत होत्या.
असे जिव्हारी लागणारे, खोटे, बिन बुडाचे आरोप ऐकून सईची तळपायाची आग मस्तकात गेली.
हा खरे तर तिच्या शालीन संस्कारावरच आरोप होता.