नणंदबाईंची दिवाळी - १

मधुरा आणि श्वेताचे तसे चांगले पटतं होते. श्वेताच्या लग्नाच्या आधीपासूनच दोघींमध्ये छान जमायचे. कधी कधी चिडायच्या एकमेकींवर, राग यायचा पण तरीही करमत नसायचे दोघींना बोलल्या शिवाय. नणंद भावजय कधी वाटल्याच नाही त्या, एकमेकींच्या मैत्रीणी जास्त वाटायच्या. मजा मस्ती, पिक्चरला जाणे, बाहेर खाणे, शॉपिंग करणे.. घरात काय आणायचं किंवा सजावटीचे काहीही असो, हे सगळं त्या दोघी मिळून करायच्या. श्वेताचे लग्न झाले. तिच्या लग्नाचे सगळे काम अगदी आईप्रमाणे केले मधुराने. तिला काय हवं नको ते सगळे बघितले. साडी पिनपासून ते अगदी चप्पलपर्यंत सगळं मधुराने बघितलं होतं. घरातली सून म्हणून ती सगळी जबाबदारी अगदी छान आणि मनापासून पार पाडत होती; त्यामुळे सगळ्यांनाच तिचे विशेष कौतुक होते.