नांदू द्या ना सौख्यभरे.. भाग ८

पाहुण्यांसमोर शोभा नको म्हणून ज्योतीताई काही बोलल्या नाहीत. पण ते इतक्या दुरून आलेले, त्यात जेवायच्या वेळेपर्यंत थांबवायचे म्हणजे? खरंतर दोन माणसांचं जेवण त्यांच्यासाठी जड नव्हतं. पण रीतीरिवाज एवढं भिनले होते की थोडाही वेगळा विचार त्या करू इच्छित नव्हत्या. पटकन आवरून त्या बाहेर आल्या. तोपर्यंत शोभाताई आणि प्रदीपराव चहापाणी घेऊन, फ्रेश होऊन तयार होते. गाडीत बसून सगळे शेतावर निघाले. शेत वगैरे बघून शोभाताई आणि प्रदीपराव खुश झाले. पण चालायची सवय नसल्याने त्यांना दमायलाही झाले. ते थकून एकाजागी बसले.