नाटक पाहणं _ मनमुराद आनंद सोहळा

दोघे लगेचच निघून नाट्यगृहापाशी आले पाहतात तो काय ' हाऊसफुल ' ची पाटी त्यांना दिसली. ते मनोमन खूष झाले कारण त्यांनी शहाणपणा करून पेपर मध्ये जाहिरात बघितल्या बरोबर ॲडव्हान्स बुकिंग केलं होतं. त्यांना तिसऱ्या रांगेतली तिकिटे मिळाली होती. त्यांनी आत प्रवेश केला आणि ते आनंदाचे डोही आनंद तरंग वातावरण पाहून त्यांचे मन उल्हासित झाले. वसंतराव मान्यवरांना नमस्कार करत होते. खरोखर नाट्यगृहातील वातावरण खूपच आल्हाददायक होते . स्त्रियांनी ठेवणीतल्या साड्या नेसल्या होत्या. बहुतेक स्त्रियांनी सुवासिक गजरे माळले होते तर कोणी गुलाबाचे एखादे फुल आंबाड्यावर तिरकस घातले होते . एखाद्या हौशी स्त्रीने नथही घातली होती. पुरुषही काही मागे नव्हते. काही जणांनी कुर्ता पायजमा घातला होता. काहींनी छान शर्ट पँट घातले होते. काहींनी जॅकेट घातले होते. सर्वत्र अत्तराचा, सेंटचा नव्हे, सुवास दरवळत होता.