नात्यांची गुंफण - १

सानिका आणि सारा ह्या दोघी बहिणी आपल्या आई बाबांसोबत शहरातील एका उपनगरात राहत होत्या. सानिका तिशीच्या आसपासची होती तर सारा केवळ एकवीस वर्षांची. सानिका चारचौघीत उठून दिसणारी पटकन कोणालाही आवडेल अशीच होती. परंतु घरच्या परिस्थतीमुळे तिने लग्नाचा विचार केला नव्हता. तिचे बाबा एका चांगल्या कंपनीत नोकरीला होते. परंतु सहा सात वर्षांपूर्वी ते आजारी पडले. दोन तीन वर्ष त्यांच्या आजारपणात गेली. अशात त्यांची नोकरी टिकून राहणे शक्य नव्हतं. त्यात त्यांची जमापुंजी संपून गेली. सानिकाच्या नोकरीवर त्यांचे घर चालत होते. तिची आई घरातल्या घरात पापड, लोणची आणि इतर खाद्य पदार्थ तयार करून विकत होती. साराचे शिक्षण नुकतेच संपले होते. तिचे नोकरीसाठी प्रयत्न चालू होते. तीही दोन तीन शिकवण्या घेत होती. तिच्या बाबांना हल्लीच घराजवळ एका तयार कपड्यांच्या दुकानात मॅनेजरची नोकरी मिळाली होती. पगार जास्त मिळत नसे पण त्यांचा वेळ चांगला जाई आणि मी देखील काहीतरी घरासाठी करू शकतो हे समाधान होते. सानिकाचे आईबाबा तिला वारंवार सांगायचे तू आता लग्न कर. आता सारा पण हाताशी येईल. आम्ही करू सगळं नीट. ‌ ह्यावर सानिकाचे एकच म्हणणं असायचं की ह्या परिस्थितीत मी लग्न करणार नाही.