नात्यात गोडवा हवा भाग ३ अंतिम

"मला काय म्हणायचे आहे हे तुला चांगलं कळलं आहे; पण तरीही सांगते. शामलची सून असेल तिला त्रास देणारी. तिला येत असेल वाईट अनुभव, मग तिचं ऐकून तू देखील वैभवीला तसंच वागवणार आहेस का? आल्यापासून बघतेय वैभवीसोबत तू कशी तुटक वागतेय. कसल्याही गोष्टीची कमी करत नाही ती पोरगी. जीव तोडून प्रयत्न करते आहे माणसं जोडायचा. अमकीची सून अशी वागते, तर माझीही सून अशीच वागेल तसा विचार करून तिच्याशी अंतर ठेवून वागणं कितपत योग्य आहे? तुलाही असाच अनुभव येईल हीच भीती डोक्यात ठेवून आधीच नात्यात दुरावा निर्माण केला आहेस. काही महिन्यांपूर्वी तूच मला सांगत होती की, वैभवी तुला मॉलला पिक्चरला घेऊन जाते, गप्पा मारते. साधना, तुझ्यापेक्षा चार पावसाळे जास्तच पाहिले आहे म्हणून सांगतेय असं वागू नको. तुला माहितीये आपल्या बाजूला लक्ष्मी काकू होत्या? आज वर्ष झालं एकट्याच गावी राहतात. नवरा देवाघरी गेल्यावर त्यांना आशा होती की, मुलगा त्यांना घेऊन जाईल पण तसं झालं नाही. वयोमानानुसार काहीच जमत नाही. आजारी पडल्या तर बाजूची माणसं दवाखाण्यात घेऊन जातात. मुलगा पैसे पाठवतो. त्यांना अजूनही आशा आहे मुलगा घेऊन जाईल. आजूबाजूला बरंच काही घडत असतं साधना. चांगल्या,वाईट अनेक घटना घडतात, त्यातून आपण काय घ्यायचं ते आपण ठरवायचे.