नात्यातील अंतर भाग 3 (अंतिम)

"प्रशांत बाळा अरे हे तुझेच पैसे आहेत. तू गेली वीस बावीस वर्ष दर महिन्याला जे पैसे मला पाठवत होतास ते मी हळूहळू जमा करत होतो. जसजसे पैसे जमले तशी तशी त्याची एफडी केली. तुझे इन्क्रिमेंट झालं की माझी FD मधील रक्कम वाढायची. मग मी ते अजून गुंतवायचो. सुरुवातीला FD तीन वर्षांसाठी ठेवली. मग जास्त परतावा मिळाला की अधिक जास्त रक्कम गुंतवत गेलो. हळूहळू नामवंत कंपनीचे काही शेअर्स घेतले आणि त्यामध्ये ही काही रक्कम इन्वेस्ट केली. थेंबे थेंबे तळे साचे म्हणतात तशी गोष्ट झाली. खूप चांगले रिटर्न्स मिळाले. आता हे बरेचसे पैसे जमा झालेत. हे माझ्या नातीसाठीच आहेत. तुला आठवतं का, तुला तरुणपणी डॉक्टर व्हायचं होतं त्यावेळी माझ्याकडे पैसे नव्हते, त्यामुळे तुला डॉक्टर होता आलं नाही पण त्याचवेळी मी ठरवलं खूप पैसे साठवायचे आपल्या मुलाचं नाही तर किमान नातवंडाचं स्वप्न पूर्ण करायचं. मला पैसे जमवण्याचा ध्यास लागल. तू पाठवत असलेले पैसे आणि माझी रिटायरमेंट वेळीची पुंजी मी गुंतवत गेलो." नं थांबता बाबा बोलतच होते.