नवा जन्म घेई विजेता

दर वर्षी प्रमाणे यंदाही ईरा चॅम्पियन्स ट्रॉफीचे वारे वाहू लागले आणि त्यात भाग घेण्याचा मोह काही आवरला नाही. ह्या स्पर्धेत भाग घेण्याचा महत्वाचा उद्देश होता तो म्हणजे नवीन काही तरी शिकायला मिळेल. अगदी तसंच झालं स्पर्धा सुरू झाल्यापासून ते अगदी शेवटच्या क्षणापर्यंत वेगवेगळे अनुभव आले आणि अनेक गोष्टी शिकायला मिळाल्या.
स्पर्धेसाठी संजना मॅमकडे नाव दिले. उत्सुकता होती आपल्या टीममध्ये कोण असणार? शेवटी तो दिवस आला आणि चिठ्याद्वारे कोण कोणत्या ग्रुपमध्ये जाणार हे कळले. माझं नाव ज्या ग्रुपमध्ये आलं ते पाहून सकारात्मक वाटलं कारण त्या ग्रुपमध्ये सगळ्याच लेखकांनी स्वतःच्या लिखाणाने वाचकांवर वेगळी छाप सोडली आहे. खरं तर तेव्हाच मनातून आवाज आला आपली टीम नक्की जिंकणार. स्पर्धा होती म्हणून थोडी धाकधूक होती, पण तरीही शेवटपर्यंत एक विश्वास होता विजय माझ्या संघाचा होणार.