निर्णय- असाही भाग ४

" तर... मी आता सुरुवात करतो. कृपया तुम्हाला जे काही बोलायचं असेल ते माझं वाचन पूर्ण झाल्यावरच बोला. सगळ्यांना नंतर बोलण्याची संधी दिली जाईल. ठीक आहे. तर मी आता वाचन करतो. मी खाली सही करणारा सदाशिव रावले. पूर्ण शुद्धीत माझे मृत्यूपत्र तयार करत आहे. माझ्या एकूण संपत्तीची मी वाटणी करत आहे. सगळ्यात आधी माझं हे राहतं घर. हे घर मी वाचनालयाला दान देत आहे. दिनांक १ पासून ह्या घराचा ताबा त्यांना देण्यात यावा. त्यांनतर वडिलोपार्जित मला मिळालेली चाळ ही आधार बालश्रमाला देण्यात यावी. माझी शेती ही आधार वृद्ध आश्रमाला देण्यात यावी तसेच माझे गावाकडचे घर देखील ह्या एक तारखेला आधार आश्रमलाच देण्यात यावे. माझी जी काही दुकाने आहेत ती दुकाने ही माझ्या चारी मुलांना म्हणजे, राघव रावले, रचना मोरे, स्वर आणि सान्वी रावले यांच्यात समांतर वाटून द्यावी. हे मृत्यूपत्र मी माझ्या पूर्ण शुद्धीत आणि माझ्या इच्छेने लिहीत आहे. त्यासाठी माझ्यावर कोणी दबाव किंवा जबरदस्ती केली नाही. खाली सही सदाशिव रावले.