पडदा भाग-३(अंतिम)

"सर्वांनी लक्षपूर्वक ऐका. मोहिनीचा मृत्यू हा चुकीची भाजी खाल्ल्याने नाही झालेला आहे तर ती चुकीची भाजी तिथे मुद्दाम ठेवण्यात आलेली होती. ज्यावेळेस आम्ही या प्रकरणाचा तपास करत होतो त्यावेळेस आम्ही मोहिनी आणि निशांत ज्या बिल्डिंगमध्ये राहतात तिथल्या प्रत्येक व्यक्तीची संवाद साधून सखोल चौकशी केली, पण सर्वांनी मोहिनी आणि निशांतचे एकमेकांवरती प्रेम आहे, हेच आम्हाला सांगितले परंतु त्यातील एक माहिती थोडी खटकणारी होती आणि ती माहिती म्हणजे मोहिनीने दोन दिवसांपूर्वी मेथीची भाजी बाजारातून विकत आणलेली होती. ती तिने त्या दिवशी जेवण बनवण्यासाठी वापरली नव्हती आणि त्याच्या दुसऱ्या दिवशी ती भाजीच कचऱ्याच्या डब्यामध्ये कचरा गोळा करणाऱ्या कर्मचाऱ्यांना सापडली आणि ती भाजी दुसरी तिसरी कोणी न टाकता निशांतनेच टाकलेली होती. दुसरी विषारी भाजी जी मेथी सारखीच दिसते ती निशांतने फ्रीजमध्ये आधीची खरी मेथीची भाजी फेकून दिल्यावर त्या जागी ठेवली होती. तसेच रात्रीची जी विषारी भाजी होती. त्यातली राहिलेला पाचोळा सुद्धा निशांतने रात्री आल्यावर बाहेर फेकून दिला हे सोसायटीच्या सीसीटीव्ही मध्ये दिसत होते. हे सर्व इतकी खबरदारी घेऊन निशांतने केले होते की त्याबद्दल कोणाला कळणारच नव्हते आणि ती विषारी भाजी मोहिनीने रात्री जेवणासाठी बनवली होती आणि त्याच दिवशी निशांत हा जेवणासाठी घरी नव्हता तर तो त्याच्या मित्रांसोबत बाहेर जेवायला गेला होता म्हणून मिस्टर निशांत भांडे हेच मोहिनीच्या मृत्यूला जबाबदार आहेत."  हे ऐकल्यानंतर निशांतच्या चेहऱ्यावरचे भाव बदलले.