पाहिले न मी तुला..! भाग -14

"हे बघा आसावरी मॅडम, मी तुम्हाला घाबरवत नाहीये. पण हे सर्व तुम्हाला माहिती हवे म्हणून सांगतोय. कारण किमो म्हटले की आपल्याला केवळ केस गळून टक्कल पडणे एवढेच माहिती असते. त्याव्यतिरिक्त इतर दुष्परिणामसुद्धा असतात हे माहिती असायला हवे. केस गळले तर काही दिवसांनी ते परत येतातच, पण त्या काळात गळून पडलेला आत्मविश्वास परत आणणे खूप महत्त्वाचे असते.
ह्या सगळ्यात आवश्यक असणारी गोष्ट म्हणजे आपल्या माणसांचा एक भावनिक आधार. तो असला तर आपण कशावरही मात करू शकतो. छोट्या मुलांच्या बाबतीत तो भावनिक आधार त्यांच्यापेक्षा त्यांच्या पालकांना हवा असतो. कारण आपली कोवळी मुलं अशा अवस्थेतून जाताना बघून ते खचून जातात."
हे सगळे ऐकताना आसावरीच्या डोळ्यात पुन्हा पाणी तरळले.