परतफेड भाग-३ अंतिम

लग्न पार पडले, डोक्यावरचा लग्नाचा ताण उतरला होता. शारदा आणि संपत आनंदी होते कसलेही कर्ज न घेता एक मुलगी उजवली होती. आता दोन मुले आहेत त्यांचे पण हळूहळू चांगलेच होईल. चार पाच वर्षात मुलगा कमावता होईल मग हे दिवस जाऊन चांगले दिवस बघायला मिळतील. भाऊ बहिणींनी केलेल्या मदतीची परतफेड त्यांच्या मुलांच्या लग्नात करू असे त्यांचे संभाषण सुरू होते.

संपत आणि शारदा आपल्या शेतात रात्रंदिवस काबाडकष्ट करत होते, मुलाला मुलीला शिकवत होते. दोन नंबरची मुलगी राधा शिक्षण पूर्ण करून नोकरी करु लागली. घराला हातभार लावू लागली. पाच सहा वर्षे उलटली. दरम्यान शारदाच्या दोन नंबरच्या मुलीचे ही लग्न झाले, तिच्या मुलाला सुजयला चांगली नोकरी मिळाली आणि तिच्या आयुष्यत टर्निंग प्वाईंट आला,हळूहळू शारदाला चांगले दिवस आले. घरची परिस्थिती सुधारली, संसार सुखासमाधानात सुरू होता. सगळी सुखं तिच्या पायाशी लोळण घेत होती, पण ती पहिले दिवस विसरली नाही.