परतुनी येईल मी... भाग ४

आता साधारण संध्याकाळ चे आठ वाजत आले होते. कॉफीने बरेच बरे वाटत होते त्याला. पण तरी मन मात्र अजूनही अस्वस्थ होते. टीव्ही बघून मनावरील ताण कमी करण्याचा त्याचा प्रयत्न सुरू होता. विशाल त्याच्यामानातील जाणून घेण्याचा प्रयत्न करत होता. पण मिहिर काही बोलत नव्हता. काहीवेळात बिर्याणी आणि सूप आले. ते घेऊन विशाल किचनमध्ये गेला आणि थोड्यावेळात येताना दोन ग्लास, एका प्लेट मध्ये चिवडा, सोबत थंडगार बिअर च्या दोन बाटल्या घेऊन आला.