प्रतिबिंब ( भाग तिसरा )

किती विचित्रं गोष्ट आहे ही. बुद्धी वाटपाच्या वेळी चहाची गाळणी घेऊन गेलेल्या माणसाला. घटना काय आणि आयुष्य काय, काहीही बोलायचं म्हणजे काय. एखाद्या सशाला किंवा उंदराला असा प्रश्न विचारला तर त्याला कसं लाजल्या सारखं होईल. अगदी तसंच झालं बघा माझं सकाळी सकाळी ???... आठवणींच्या बाबतीत तर मी अफाटच आहे. कोणाला जर मी पैसे उधार दिलेले असतील तर लक्षात राहतं बरोबर पण कोणाकडून घेतले असतील तर कामाच्या रगाड्यात लक्षातच राहात नाही बघा. लग्नात पण असाच गोंधळ होतो माझा.बिल्डिंग मधल्या एका लग्नात तर मी आमच्या कडे आलेल्या पाहुण्यांसकट जेवायला गेलो होतो.सगळ्या लोकांनी पैसे काढून एकच पाकिटं द्यायचं ठरवलं होतं. ते पाकिटं मी द्यावं असं सगळ्यांना वाटलं. नेमकं आईस्क्रीम खाण्याच्या आणि फोटो काढण्याच्या नादात विसरूनच गेलो द्यायला. आता माणूस आहे होतेच चूकभूल. पण लोकं काय चांगले नसतात आपल्या सारखे म्हणून मी कोणालाच बोललो नाही. उलटं त्या पाकिटातल्या पैशातून देवाला पाच रुपये दान पेटीत टाकले. कशाला कोणाचे सगळे पैसे घ्यायचे. तसा मी धार्मिक आणि पापभीरु आहे. एका लग्नात पाकिटं दिलं तर त्यात पैसेच ठेवायला विसरलो, इतकंच नाही तर पाकिटावर नावं पण चुकून घाटपांडेच टाकलं गेलं. आता तेंव्हा विसरलो होतो हे आता आठवून आठवून कबूल करतोच आहे ना. पण चांगुलपणाला किंमत नसते.