प्रेमाचा रंग एक असाही

दारातून आत येताच त्यांना दर्शन झाले ते भल्यामोठ्या गणेश मूर्तीचे. तिथे पाया पडून पुढे जाताच ते एका प्रशस्त हॉलमध्ये पोहचले. हॉल तास मोठा होता, हॉलमध्ये मधोमध बसण्यासाठी सोफे ठेवले होते. ऐसपैस सोफा, त्याच्या लगत तसाच खुर्च्या, बाजूला अजून एक सोफा आणि त्या सगळ्यांच्या मध्ये एक टेबल. सोफ्यावर काही माणसे आधीच येऊन बसली होती. ते दोघे आत जाऊन एका कोपऱ्यात उभे राहिले. हॉलच्या उजव्या बाजूला स्वयंपाकघर होते. तिथे बायकांचा चहा नाश्ता बनवत असताना गोंधळ चालू होता. हॉलच्या डाव्या बाजूला दोन दरवाजे दिसत होते पंरतु सध्या ते बंद होते. एका कोपऱ्यातून एक जिना वरच्या मजल्यावर जात होता. वर तीन खोल्या होत्या. तिथून एक रूबाबदार व्यक्ती जिना उतरत खाली येऊ लागली. ती व्यक्ती जशी खाली येण्यास निघाली तसं खाली बसलेली माणसे आपापल्या जागेवर उभी राहिली.