प्रेमसिया: CRUEL LOVESTORY ( भाग ४ )

            देवांश सोनाजी सरंजामे, असं त्याचं नाव होतं. गर्भ श्रीमंत असलेला तो तसाच गर्भ गर्विष्ठ देखील होता. राक्षसी वृत्ती त्याच्यामध्ये ठासून ठासून भरलेली होती. आपल्यासाठी हानिकारक असलेल्या लोकांना तो कधीच सोडत नव्हता. आजपर्यंत त्याला जी हवी ती वस्तू जागेवर आणि हातात मिळत गेली होती. आज त्याची एक महत्त्वाची वस्तू सियाकडे होती. ती वस्तू जर त्याला नाही मिळाली तर त्याला स्वतःला देखील कळणार नव्हतं तो काय करणार ते. सिया एक मुलगी आहे आणि तिचा आपल्या हातून जीव जाऊ नये याचा तो प्रयत्न करत होता, पण सिया देखील काही कमी नव्हती. हेच तर तिचं वेगळं प्रोफेशन होतं. ज्या वस्तू घातक आहेत त्या वस्तूंना ती त्या व्यक्तीपासून दूर करत होती. जी वस्तू सध्या तिच्याकडे होती ती पुन्हा त्याच्या हाती लागल्यावर तो पूर्ण शहराला बरबाद करणार हे नक्की होतं, म्हणूनच तिने ती वस्तू कोणाच्याही नजरेत न येता शिताफीने चोरून आणली होती. जेव्हा देवांशला समजलं होतं तेव्हापासून तो दोन तीन दिवसांआड तिला फोन करून असाच परेशान करत होता, पण ती काही त्याच्यापुढे हरली नव्हती. आता ती वस्तू पुन्हा त्याच्या हाती लागू द्यायची नव्हती, याची तिला काळजी घ्यायची होती.