प्रिया आज माझी भाग १४

मामानी प्रियाला खुणावले तसे ती पाटावर जाऊन उभी राहिली. समोर अंतरपाट आणि त्या पलीकडे तो....तिचा शेखर...जे सर्व घडत होते ते कल्पनातीत होते. भटजींनी तिच्या हातात हार दिला. दुसरी मंगलाष्टक सुरू झाली. तिचे लक्ष मात्र अंतरपाटाकडे होते...जणू आत्ता या क्षणी ती शेखरच्या मनातील द्वंद्व जाणून घ्यायचा प्रयत्न करीत होती. एका मागोमाग एक मंगलाष्टके म्हटली जात होती. पण तिच्या कानावर काही एक ऐकू येत नव्हते.....कानावर पडत होते ते हृदयाचे ठोके.... धडधड. हे होतेय ते चांगल्यासाठी होतेय का....यातून काय साध्य होणार आहे... या लग्नाचे पुढे भवितव्य काय....