प्रिया आज माझी भाग ४९

शेखर मी माझा शब्द पाळलाय. इतके दिवस तुम्ही मला इथे राहायला दिलेत त्याबद्दल तुमचे खूप खूप आभार.
इतक्या दिवसात या घराची, आईंची...आणि तुमची खूप सवय झाली होती मला....आता ही सवय सुटेल की नाही माहित नाही..पण माझ्या इथून जाण्यामुळे तुमच्या आयुष्यात आलेले अडथळे नक्कीच दूर होतील. आणि मी हे कोणत्याही प्रकारच्या रागाने लिहित नाही...तसे तुमच्यावर रागवायचा अधिकार मला कुठे होता...तो तर हक्काच्या माणसांवर असतो ना..माझ्या आधी तुमच्यावर मिहिकाचा अधिकार आहे...तुम्हा दोघांचे एकमेकांवर प्रेम आहे. माझ्यामुळे उगाचच तुमच्या नात्यात वितुष्ट आले होते. सहा महिन्यापूर्वी जे काही झाले ...म्हणजे आपले लग्न, माझे इथे येणे, इथे राहणे सर्व काही विसरून जा...कोणी प्रिया तुमच्या आयुष्यात आलीच नव्हती असे वागा.