राजनंदिनी - लव्ह इन एअर (भाग 4)

राजवीरला समजेना की आता काय करावं. नक्की काम काय आहे हेसुद्धा त्याला माहित नव्हतं. तो शांतपणे तिथे एका बाजूला बसला. त्या स्त्रीने आपलं लक्ष मोबाईलमध्ये वळवलं. तिथे राजवीर मुलांकडे पाहत होता. साधारण तीन ते दहा या वयोगटातली मुलं होती. तिथे अनेक खेळणी होती. खाऊ होता. काहीजण तिथे एन्जॉय करत होते. तर काहीजण शांत बसून होते.

त्यात त्याला बाजूलाच एक मुलगी दिसली. गुलाबी रंगाचा प्रिन्सेस ड्रेस घालून ती एका कारकडे पाहत बसली होती. राजवीरला तिच्या वागण्याबद्दल आश्चर्य वाटलं. ती एकाच जागी स्थिर बसून निरीक्षण करत होती. तिची नजर जराही कुठे हलली नाही. एवढ्या लहान वयात मुलं फार चंचल असतात. असं असताना ही मुलगी एवढी शांत का असावी हे त्याला समजेना.