राजनंदिनी - लव्ह इन एअर (भाग 6)

ती हसतच पुढे गेली. जोसेफला तिचा स्वभाव माहित होता. ती रुड होती. पण त्याहून जास्त विलक्षण धूर्त व्यक्ती होती. एवढ्या लहान वयात एवढं साम्राज्य निर्माण करायला धूर्तपणा असावाच लागतो. ती आपल्या सीटवर येऊन बसली. तसा फक्त जोसेफ आणि तिचा एक बॉडीगार्ड सोडून बाकीचे दूरच उभे राहिले. तिथली व्यवस्था इतकी रॉयल होती की रॉयल थ्रोन म्हणाव्यात अशा खुर्च्या त्यांना बसण्यासाठी ठेवलेल्या होत्या. पण त्यामुळे त्यांच्यामधील अंतरही कमी झालेलं होतं. आपल्या बाजूला मिस. नंदिनी अहुजा बसलेली आहे हे पाहून लिओ स्वतःशीच हसला. लिओ एक तिशीच्या आसपास असणारा तरुण होता. मनातून नंदिनीवर फिदा असणाऱ्यांपैकी एक.. पण प्रत्यक्षात नंदिनीचा कट्टर प्रतिस्पर्धक. लिओचा 'फ्लोरा जेम्स' नावाचा ज्वेलरी ब्रँड होता. जो कायम 'पर्ल' सोबत स्पर्धा करू पाहायचा. पण अजूनतरी त्यांना यश आलेलं नव्हतं. नंदिनीचे सर्व देशात असणारे कॉन्टॅक्ट्स, तिची काम करण्याची पद्धत, पर्लच्या स्टाफमध्ये असणारी शिस्त ह्या सगळ्याच गोष्टी  तिला एक हायली सक्सेसफूल बिजनेसवूमन बनवत होत्या.