रुममेट भाग २

‌शनिवारी रविवारी जेव्हा आर्या घरी असायची तेव्हा दुसरी मुलगी कुठे आहे असे तिने एकदोनदा आर्याला विचारले होते.
" स्वीटी बाहेर गेली आहे. पार्लर मध्ये गेली आहे. सामान आणायला गेली आहे," असे त्या त्या वेळी आर्याने सांगितले होते.
"सुट्टीच्या दिवशी तू बाहेर फिरायला जात नाहीस का? किंवा मैत्रिणीसोबत बाहेर जात नाहीस का?" असे मावशींनी तिला एकदा विचारले तेव्हा आर्या म्हणाली,
" मला नाही आवडत बाहेर फिरणे. मला घरातच बसायला आवडते."
त्यामुळे मावशींनी तिला परत काही विचारले नाही. शेवटी प्रत्येकाची आवड निवड वेगवेगळी असते. तसेही शांता मावशी आपण भले आणि आपले काम भले या विचारांची होती. कुणाच्या खाजगी आयुष्यात डोकावून त्यांना त्रास देणे योग्य नाही असे तिचे स्पष्ट मत होते. गेली अनेक वर्षे ती भांडी फरशीची कामे करत होती.