रूम नंबर १३ : भाग ४

सर्वात आधी त्याने त्याच्या रूम नंबर ११ मधून म्हणजे त्याच्या खिडकीच्या बाल्कनीतून रूम नंबर १३ च्या खिडकी पर्यंत पोचवणारी स्लाबचीच एक चिंचोळी पट्टी त्याने शोधून काढली. जेणेकरून त्याला सहज या रूम मधून त्या रूम मध्ये वेळोवेळी जाता येईल. हा मार्ग सुद्धा अतिशय धोक्याचाच होता,अगदी थोडा जरी तोल गेला तरी कपाळमोक्षच! पण तरीही तो त्याला सुरक्षित वाटत होता कारण समोरच्या दारातून आत प्रवेश करणे किती धोकादायक आहे याची त्याला चांगलीच जाणीव झाली होती. त्यादिवशी तो कसाबसा तिथून निसटला होता नाहीतर दार बंद झाल्यानंतर तिथून बाहेर पडणे त्याच्यासाठी फार अवघड झाले असते. वाघाच्या गुहेत कधीकाळी फसलाच तर त्यातून सुटका होण्याचा तो एकमेव मार्ग होता. गुप्ततेसाठी लावलेल्या पडद्यांमुळे लॉक न केलेली खिडकी सुद्धा त्यात लपून जाणार होती.